4.
De Berthichilde
Mens deuota Deo, Berchilde corde coruscans
Pectore sub cuius Christus amore manet,
Despiciens mortale malum, uitalia seruans,
Vnde fugis terras, hinc petis astra magis.
5
Inmaculata micans, nescis contagia mundi,
Sordibus humanis libera membra geris.
Digna pudicitiae debentur praemia sacrae,
Virgo dicata Deo, hinc rapienda polo.
Ille tenet caelos cui tu complexa uideris:
10
Quo tuus est sponsus, huc eris ipsa simul.
Non cupis auro humeros nec collum pingere gemmis,
Sed melius casto pectore pura micas.
Mutasti uestem, mutasti gentis honorem,
Cum thalamis Domini sponsa iuganda uenis.
15
Quam meliore uia meruisti uota tenere,
Quando Creatori, forma creata, places!
Pauperibus largas das esurientibus escas:
Nescit habere famem qui tua tecta petit.
Qui sine ueste iacet, tegmen pietate ministras:
20
Vnde calet nudus, frigora nulla times.
Te redimente pia, captiui uincula laxant:
Quae soluis uinctos, libera semper eris.
Distribuis censum nulli sua uota negando
Diuitiasque tuas omnibus esse facis.
25
Colligis in caelis quicquid dispergis in aruis.
Semina nunc fundens, post meliora metes.
Quicquid habet mundus fugitiuo tramite transit.
Tempore tu modico semper habenda facis.
Hic tibi longaeuis sit uita superstes in annis,
30
Rursus in aeternum sit tibi uera salus.