4.
Dius apex carne effigians genetalia limi
Vitali terrae conpingit sanguine gluten,
Luciferax auras animantes affluit illic:
Conditur enixans Adam factoris ad instar;
5
Exiluit protoplasma solo, res nobilis usu,
Diues in arbitrio radianti lumine: dehinc
Ex membris Adae uas fit tum uirginis Euuae:
Carne creata uiri dehinc copulatur eidem,
Vt paradyssiaco bene laetaretur in horto.
10
Sed de sede pia pepulit temerabile guttur,
Serpentis suasu pomi suco atra propinans.
Insatiatrici morti fames accidit illinc.
Gauisurus ob hoc caeli fluis arce locator,
Nasci pro nobis miseraris et ulcere claui
15
In cruce configi: tali malagmate inunctis
Vna salus nobis ligno agni sanguine uenit.
Iucunda species: in te pia bracchia Cristi
Affixa steterunt et palma beabilis, in hac
Cara caro poenas inmites sustulit haustu.
20
Arbor suauis agri, tecum noua uita paratur;
Electa ut uisu, sic e crucis ordine pulchra
Lumen spes scutum gereris liuoris ab ictu.
Inmortale decus nece iusti laeta parasti.
Vna omnem uitam sic, crux, tua causa rigauit,
25
Imbre cruenta pio: uelis das nauita portum,
Tristia summerso mundasti uulnera clauo,
Arbor dulcis agri, rorans e cortice nectar,
Ramis de cuius uitalia crismata fragrant,
Excellens cultu, diua ortu, fulgida fructu,
30
Deliciosa cibo et per poma suauis in umbra.
En regis magni gemmantem et nobile signum,
Murus et arma uiris, uirtus, lux, ara precatu,
Pande benigna uiam, uiuax et fertile lumen;
Tum memor adfer opem nobis, e germine Dauid,
35
In cruce rex fixus iudex cum praeerit orbi.